Bok 11: Dansk krim

Då eg las bokmeldinga på systra mi sin blogg, fekk eg lyst til å lese denne krimromanen.  I går ettermiddag hadde eg 140 sider att.  Medan resten av familien var på ulike aktivitetar, sneik eg meg til å sitte i godstolen.  Det var omtrent umuleg å legge boka frå seg.

Krimhelten i boka, Carl Mørck, er attende på jobb etter ein skyteepisode der ein av kollegaene hans vart drepen og den andre hardt skada.  Sjefen hans har kome på ein idé for å få meir pengar, nemleg starte opp ei avdeling Q som skal jobbe med gamle saker.  Denne avdelinga vert plassert i kjellaren, godt ute av vegen.  Mørck får ein innvandrar til assistent. 

Saka dei starten med er forsvinninga av Merete Nygaard frå ferja.  Ho er ein politikar som bur saman med den handikappa broren sin.  Vi får vite at Merete er fanga i eit trykkammer.

Boka er velskriven med god framdrift.   Personane er spennande.  Ikkje minst lurer vi på kven denne Assad eigentleg er!  Eg likte løysinga, og eg likte slutten.  Kanskje eg skal prøve å sikre meg bok nummer to til påske?