Dagens blomst 23. juli: Groblad

Groblad Plantago major

Akkurat dette eksemplaret foreviga eg rett før plenklipparen tok det.  Groblad finn ein der folk ferdast.  Den toler godt å bli trakka på.  Elles har den vorte brukt på sår og byllar som "plasterplante".

Dagens blomst 21 juli: Blåklokke

Blåklokke Capunala rotundifolia
Då er eg tilbake med fleire vanlege blomster ein bør kunne namnet på.  Campunala-familien er stor.  Ein finn også staudar med dette familienamnet.

I floraen står det at blåklokka liker seg best på tørre og magre veksestader.  Denne fann eg langs vegen på Daftö camping i Strømstad.

Dagens blomst 9. juli: Vikke

Fuglevikke Vicia cracca
Dette er ein blomst ein finn på opne stader.  Den likar mykje lys,

Med dette tek eg ein pause i serien "Dagens blomst". Floraen "Norges planter" i fire band, vert ikkje med på ferie!  Blogglesarane må gjerne ta seg ein tur ut og fotografere ville vekstar.  Det er lærerikt!  Den beste måten å lære noko på i følgje pedagogikken, er å lære andre noko.

Dagens blomst 7.juli: Tistel

Åkertistel Cirsium arvense
Slik eg les det, er dette ein åkertistel.  Den er Noregs mest vanlege tistel.

Dagens blomst 6. juli: Høymol

Vanleg høymol Rumex longifolius
longifolius=med lange blad

Det er ikkje sikkert ein vil kalle dette ein blomst, men det er i alle fall ein vekst som alle bør kunne namnet på.  Høymolen er i syrefamilien, altså i slekt med surgras.  Den er vel noko av dt værste ugraset ein kan tenke seg.  Røtene er vanskelege å få opp.  Frisk er høymolen godt for.  Kaninane her et det gjerne.  Men tørka som høy, er dei lite populære.

Dagens blomst 5. juli: Engsoleie

Engsoleie Ranunculus acris

Smørblomst, som den også vert kalla, er Noregs mest vanlege blomst.  Den er giftig når den er frisk, men tørka til høy kan dyra ete den.

Dagens blomst 4. juli

Sidan det ikkje vart "dagens blomst" i går, vert det to i dag.  Men eg har gjort det lett for lesarane.

Raudkløver Trifolium pratense

pratense=den som veks i enga

Raudkløver bind nitrogen frå atmosfæra ved hjelp av baktrieknollane på røtene på same måte som erteplantane.  Ei kløvereng produserer altså nitrogen sjølv. 

Kvitkløver Trifolium repens 
repens=krypande

Dagens blomst 2. juli: Jonsokblom

Raud jonsokblom Silene dioica

Dette eksemplaret fann eg oppom huset vårt, og det er ikkje så rart, for i floraen står det at han likar seg der det er mykje nitrogen og forfor i jorda. Der det er mykje naturgjødsel vil han trivast.  I Nord-Norge er den vanleg under fiskehjellar, og ein finn den nær fuglefjell. 

Dagens blomst 1.juli: Tepperot

Mure Potentilla

Eg trur dette er Tepperot Potentilla erecta.

Den har fire kronblad, medan dei andre i murefamilien har fem.  Dette er ikkje så godt å sjå på bildet, men ut i frå blada trur eg det skal stemme.

Dagens blomst 30 juni: Tettegras

Vanleg tettegras Pinguicula vulgaris

Dagens blomst 29. juni: Molte

Molte Rubus chamaemorus

På Hareidlandet er det myrlandskap, og ein finn molter mange stader.  Molteblomsten er særbu.  Det er eigne hann- og hoblomster.  Eg meiner eg lærte på gymnaset at dei raude var hannblomster.  I floraen min går det ikkje klart fram.

Molter er populære bær.  Dei inneheld både rikeleg med C-vitamin og benzosyre (naturleg konserveringsmiddel som ein og finn i tyttebær).  Det var derfor ideelt å ha med seg på sjøreiser mor skjørbuk.

Dagens blomst 28.juni: Storkenebb

Når eg leitar etter det latinske namnet, ser eg at der finst fleire medlemer i denne familien.  Eg trur dette er

Skogstorkenebb Geranium silvaticum

Dagens blomst 27.juni: Skogstjerne

Då vi skulle pynte til 10-andeklassefesten, fekk eg med meg nokre jenter ut for å hente blomster. Vi fann lupinar som vi leita etter, men og nokre andre sortar.  Eg måtte sjølvsagt sjekke om dei kunne namna på mellom anna marikåpe. Nei, fekk eg beskjed om, det er ho besta som kan sånt.  Sjølv lærte eg dei vanlegaste blomsternamna av Besta.  På gymnaset var biologi eit av dei kjekkaste faga.  Vi hadde eige herbarium i 3. klassa. 

Då eg var lærar i 4. klasse, lærte eg elevane ein blomst kvar dag frå skulestart.  Vi hadde dei ståande på kateteret, og så teikna dei og skreiv litt kvar dag.  Kva dei kan i dag, veit eg ikkje.  Men dei kosa seg med det den gongen.

Eg har også blitt inspirert av Alt godt sine bilde frå Nord-Norge.  Sjekk bloggen hennar.

Sidan eg veit at mange av elevne mine er innom bloggen, så har eg tenkt at dei skal få lære noko i ferien og.  Vert ikkje det stas?

Skogstjerne Trientalis europaea

Dette er ein vanleg blomst som mange stader.  Eg tok dette bildet på Løset i dag.