Hannes eplekake

I dag fekk eg lyst til å bake ei eplekake.  Eg kjøpte ein pose Granny Smith i går.  No har eg mange oppskrifter på eplekake.  Dette er ei av dei eg kjem attende til.  Den kjem frå ei bok frå Meierienes prøvekjøkken.  Og her er det meieriprodukt som tel: Hugs ekte smør!  Her er oppskrifta slik ho står i boka.  Eg kommenterer under.

Rund form 24 cm.

Botn:

100 g smør

150 g sukker

1 egg

75 g kveitemjøl

100 g sammalen kveite

1/2 ts bakepulver

Fyll:

3 eple

3 dl seterrømme

1 egg

50 g sukker

1 ts vaniljesukker

Rør smør og sukker lyst og luftig og tilsett egget.  Bland mjølet med bakepulver og smuldre alt lett saman.  Trykk deigen ut i ei smurd form.

Skrell epla og del dei i bitar.   Fordel eplebåtane over botnen.  Rør saman resten av ingrediensane til fyllet og hell blandinga over epla.

Steik ved 175 grader i ca. 30 minutt.

Eg liker ikkje å bake små kaker, i tilfelle steiker eg to i slengen.  I dag dobla eg oppskrifta i ei 28 cm form sidan eg ventar mange gjester.  Eg forlenga steiketida til ein time.  Eg kunne nok ha skrudd ned temperaturen mot slutten.  I oppskrifta står det sammalen kveite, grov - eg bruker alltid sammalen kveite fin.  Elles så trykte eg 8 eple ned i forma.  Når det gjeld eplekake gjeld det å ha i rikeleg med eple.  Dei krympar.

Servér eplekaka lunken med mjukpiska krem.

P.S.
Eg har sett på bakeprogramma på NRK.  Der bruker dei mykje tid på å klippe til bakepapir i botnen av springformer.  Kva gjer blogglesarane?  Eg set forma på bakepapiret og klemmer til.  Etterpå riv eg vekk det som er for mykje.