Bok 1: 2. verdskrig

Eg har budd saman med forfattaren dei tre åra han har jobba med denne boka (og gjer det enno).  Eg anar kva arbeid som ligg bak.  Det har vore mange telefonar og husbesøk.  Det har hasta med å samle inn informasjon.  Eg veit også at der er mange fleire historier som ikkje har fått plass i boka.  Etter at boka har kome ut, har fleire tatt kontakt og lurt på om han kan skrive deira historie.

Boka tek føre seg dei store linene i 2. verdskrig.  Inn i den store historia er det fletta inn fleire historier om einskildpersonar og einskildhendingar.  Eg har bladd i boka og lese delar av ho i haust, men først no har eg lese heile boka frå perm til perm.  Og det bør ein gjere, for boka er kronologisk oppbygd.

Bror til farfaren vår si historie har vi høyrt litt av under oppveksten.  Vi har visst at han var ein av dei som døde i "Ni liv".  Men først no har vi fått vite heile historia, eller det som er att av ho.  Vi får også vite kor viktig denne Shetlandstrafikken var både for persontrafikk og for å skaffe forsyningar til dei allierte.

Etter å lese boka sit ein att med mange tankar.  Kva er det som gjer at nokre vert gode nordmenn og gjer ein innsats med stor fare for sitt eige liv?  Og korleis kan andre få seg til å angi sine eigne naboar til tyskarane utan at dei sjølv er i fare på nokon måte?

Elles synest eg boka viser mange sider ved krigen.  Og sjølv kor mykje ein trur ein veit frå før, er det alltid noko nytt å lære.